Ang Republic Act 11321, o ang Sagip Saka Act, ay ipinanukala ni Senator Kiko Pangilinan at naging batas noong Abril 2019.

Ito ay naglalayon na pataasin ang kita ng mga magsasaka at mangingisda sa pamamagitan ng direktang pagbebenta ng kanilang mga produkto sa mga ahensya ng gobyerno nang walang public bidding. Nilalayon nitong alisin ang mga middleman sa kalakalan para matiyak ang seguridad sa pagkain at masugpo ang kahirapan.

Pag-organisa ng Magsasaka / Mangingisda

Tutulungang mag-organisa bilang mga kooperatiba, asosasyon, o tinatawag na farmers and fisherfolk enterprises (FFEs).

Pagsasanay at Suporta mula Gobyerno

Bibigyan ng pagsasanay sa makabagong paraan ng pagsasaka o pangingisda, ng kagamitan, at tutulungan na makapag-access ng puhunan tulad ng pautang o grant. Layunin nitong pataasin ang kalidad at dami ng produksyon upang maging mas may laban sa merkado.

Produksyon at Pag-aani

Hinihikayat ang maayos at tamang pag-handle, pag-sort, pag-pack, at kung kinakailangan, simpleng pagproseso ng inani o hinuli, para matiyak na ang mga produktong ibebenta ay may mataas na kalidad at handa para sa direktang distribusyon.

Direktang Pagbili ng Produkto (Walang Middleman)

Ang pinakamahalagang bahagi ng Sagip Saka ay ang direktang pag-uugnay ng mga prodyuser sa mga mamimili. Sa tradisyunal na sistema, dumadaan pa ang produkto sa maraming middlemen bago makarating sa merkado. Ito kadalasan ang nagpapababa sa kita ng magsasaka at nagpapataas ng presyo para sa mamimili.

Dahil sa Sagip Saka Act, maaari nang direktang bumili mula sa mga organisadong magsasaka at mangingisda nang hindi na dumadaan sa komplikadong bidding process.

> Government Procurement

Direktang bumibili ang local government units (LGUs), iba't ibang ahensya ng pamahalaan, at public institutions tulad ng paaralan, ospital, etc.

> Direct Market Access

Direktang pagbenta sa Kadiwa stores, community markets, at mga pribadong institusyon at negosyo.

Suporta sa Distribution at Logistics

Upang masigurong maayos na nakakarating ang produkto mula bukid o dagat patungo sa merkado, nagbibigay rin ang pamahalaan ng suporta sa logistics. Kabilang dito ang transportasyon, cold storage, at iba pang pasilidad na tumutulong maiwasan ang pagkasira ng produkto. Sa ganitong paraan, nababawasan ang pagkalugi ng mga prodyuser at napapanatili ang kalidad ng pagkain.